議員好關注樓市爆煲影響民生,其實陰宅供求失衡問題仲嚴重,工聯會王國興噚日喺立法會會議上話,為咗紓緩骨灰龕位需求,政府鼓勵市民選擇海葬或者將骨灰灑去紀念花園,可惜選擇咁樣做身後事嘅市民似乎唔係咁多,佢質疑政府推行新政策嘅決心。
高官經常講一套做一套,王國興話為咗令更多市民接受海葬或花園葬,官員應該身體力行,好似承諾捐贈器官咁,公開宣佈願意海葬,移風易俗要坐言起行,唔係講吓就算。有口話人,王國興噚日打開口牌,聲明日後要去見馬克思時會選擇海葬,希望負責骨灰龕位事宜嘅食物及衞生局局長周一嶽都可以學佢咁豁達。
周一嶽則指馬克思係葬於倫敦,暗寸王國興如果要見馬克思,可能唔應該選擇海葬;至於佢自己,原來一早諗定身後事。據周一嶽稱,佢已經同家人商量,萬一佢唔喺度,希望可以火化,至於土葬抑或海葬或其他方式,佢話唔方便多講私人嘢,總之就唔會動用政府資源咁話。
人誰無死?既然死亡係每個人必經之路,局長又唔使避嫌,話自己身後事唔會佔用公家資源咁決絕,唔通驚俾人質疑興建中嘅骨灰龕會預留俾官員優先使用,香港人冇咁凉薄。
不過周一嶽話辦後事唔會動用政府資源都唔係幾講得通,因為火化爐都係食環署負責。