大市昨天又再下跌，期指過去7天做了6支陰燭，下跌了1700點有多，大家在舔傷口之餘，不忙問多句有冇機會見咗頂，之前上升是假象，又或就算是升，會唔會再跌到好深先呢？
其實，從筆者近日以「海嘯來前必先潮退」及「大戶入貨前必先震倉」為題，可見士佳對現在的跌勢並不驚訝，曾說過坊間早前所講的支持位必定跌穿，24000、23800……通通都不是，目標指向50日線附近，過往也是這樣，不到50日線，難以止跌回升，因為揸了兩個月以上的投資者也要損手，方有離場的動機，貨量才會多。
能夠震倉，用股價、消息令投資者由驚買得唔夠變成驚輸，能耐絕對係超級，超級大戶背後當然實力雄厚，盤又大，如果所吸的貨量唔夠多，根本滿足唔到手持大盤的要求，勞師動眾，何苦呢？要貨夠多，就必先要冇實力及冇信念的投資者投降，所以先前我估計調整會快會深。
現在劇本初步實現，其後又會唔會否極泰來呢？

博你撈貨彈後再插

我嘅答案係冇咁易！最高超的大戶是再畀你希望，要你撈貨，然後再要你失望，之後先至升，一升便冲天。所以我估計不久便有反彈，但幅度不大，然後再插得急且深之後，就突然見底。
當然，我唔係大戶肚中的蟲，唔一定啱，以前又唔係未錯過，但拿着以上藍圖，就算估錯亦唔會太過份，中間有很多變着，可以係一跌完就升，冇咁轉折等等，但無論點變，大戶最後都係買貨，所以認清方向便可。
至於買甚麼號碼，用番上面邏輯就好簡單，一些大股早前還非常優秀、前景無限，這幾天突然下跌的便是大戶對象，不然為何要震它呢？

張士佳
寶來證券（香港）董事　投資服務部
mailto:[email protected]