呂慧儀、鍾嘉欣、唐詩詠同馬浚偉等主演嘅無綫新劇《老友狗狗》收視唔錯，上星期只係播咗3日，平均收視有31點（約198萬觀眾收睇），噚日成班演員乘勢到將軍澳新都城商場宣傳，佢哋喺台上炮製狗狗大餐，點知幾隻狗都好為食，一掃而空。

預告着三點式

呂慧儀乘機宣傳佢喺劇中一場泳衣戲，佢話：「呢套劇暫時係我最後一套電視劇着三點式，因為冇再拍，拍時身形肥少少，視覺效果好睇啲。」近日先後有選美入行嘅女藝人被揭有富豪男友照顧，睇嚟選美真係一個搵富商好途徑，呂慧儀話：「香港特別多有錢佬，自己有經濟能力同靠自己叻啲，我都冇諗選美係乜捷徑或者識富商，只係覺得可以加入娛樂圈入無綫，我都識過有錢人，但冇追過我。」
呂慧儀同港男黃文廸話分手，之後又俾人影到佢哋結伴遊離島，擺明轉玩地下情，呂慧儀話：「我哋一向都係好朋友，只係同埋另一朋友一齊去長洲，我冇乜時間拍拖。」至於情傷女主角唐詩詠話近日冇搵崔建邦，會寄情工作，唔會諗其他嘢。