踏入5月，錦興集團（275）發威，股價大升，由0.40元上到噚日的0.95元，升幅137%。
錦興雖急升，但只係追落後，仲有排未到價，連續兩日成交大增，上周五2317萬股，噚日再上到3521萬股，升勢亦只係剛剛起步而已。
去年9月中，錦興股本重組50合1，復牌後急瀉，在1.80元到1.07元間有一個大型下跌裂口，今次只要破位而上，響呢個「真空」區域，可以望空衝刺。
錦興股價絕對有上升動力，單係大折讓呢一瓣，就可以推動股價以倍計上升。同時，錦興亦係最近供完股，同埋做完「披成」嘅股份，貨源已盡入強者手中，可以看高幾線。
去年9月底中期結算，錦興發行1億股，資產淨值24.78億元；今年3月完成供股，集資約1億元，股數上升到4.01億股；5月22日配售1.2億新股，每股0.78元，集資9360萬元，股數增到5.21億股，每股NAV為5.12元。錦興現價0.95元，大折讓81.4%！
錦興主要做證券買賣同物業發展及投資，去年金融海嘯冲擊，股樓價格齊跌，集團09年度（3月年結）上半年虧損6.41元，其中兩條大數，包括持作買賣投資就虧損2.37億元、可供銷售投資就減值3.17億元。踏入09年，中港兩地股樓二市轉旺，價格亦由低位大幅回升，個別實力同二三線股仔的升幅更以倍計，對錦興非常有利。

資產靈活度高

中期結算日，集團手上所持有的可供銷售投資6.17億元，應收可兌換票據7.84億元，以及持作銷售物業1.96億元，在大圍經濟已露轉機後，相信已有可觀升值。
以昨日收市價計，錦興市值（連同配售的新股）只有4.9億元，而中期「撇到盡」及連同集資所得的資產淨值有26.7億元，即使唔當佢有升值，甚至再打個8折，資產淨值仍有21.3億元，每股NAV4.10元，股價即使在現水平翻一番，升上1.90元，仲係大折讓53%。
股價大折讓，好易引起市場憧憬，特別係市值小小，資產「靈活度」甚高的公司，更易有所動作，若然錦興大股東「的起心肝」，做番場好戲，捧場客有福了。
郭兆誠