三T頭關第五場開跑前，雷神同郭能分別揸住兩win同一win在手，結果第五場四班千六米由佢兩個串Q，郭能夥拍文廐「綫路財星」同雷神座騎高廐「歡樂一生」埋身肉搏，拍住鬥足大半條直路，最終「綫路財星」影相贏馬頭位，爆出17倍冷win，今季首次贏馬，相反「歡樂一生」換雷神跑盡影相輸，連續第三場做二奶，黑到冇朋友！
郭能連同第三場爆10倍沈廐「刺刀」在內，自製一口183倍大冷孖寶，墮馬復出後首度起孖。至於雷神幫唔到「歡樂一生」開齋，但截至第五場已取兩冠一亞一季。呢場三、四名一熱一冷，分別係季軍8.7倍「金龍華」同殿軍46倍「勇冠王」，四重彩咁就派13.3萬。
文家良說：「『綫路財星』以往四班曾贏兩場，可惜曾三次賽後被發現氣管內有大量血液，操練時要十分小心，不可太過催迫牠，上場1400米已見有不俗走勢，若非陣上曾受擠阻，理應追得更為接近。由於牠的後勁不俗，因此今仗部署增程跑1600米，果然更合發揮，加上郭能發揮很好，值得一讚。」