巴基斯坦發生恐怖襲擊，所謂地緣政治不穩的陰影旋即刮起。星俠昨日與幾名「財經演員」午飯茗茶，其中有人打開話匣子，研究邊個「唔妥」貝娜齊爾而玩到咁大？猜測會否是坊間輿論嫌疑最大那一個主使？無人知。但全球股市就震散，金價急升。
講真，巴基斯坦政治生態，「財經演員」及一眾散戶又點會識，隨興閒聊，不過是茶餘飯後話題而已！惟事件對股市已有一定打擊作用，港股亦連跌兩日，星俠稍前樂觀估計大市或能以28880左右作年結，似乎已無可能，除非下星期一07年大除夕當日港股狂升1500點過外喇！

今年物業買賣大增

市場各路人馬集中狠炒上市無耐的新股，反映股海仍沉溺在假期氣氛中，市場失去炒作主題及概念，炒新股遂成為出路，不少新股動輒升幅超過10%，問題係好多散戶在11月時受了傷，入市勇態已不及年中時期，究竟有幾多散戶能食正這一鋪「尾糊」？星俠實在好懷疑。
樓市勢頭依然大旺，日前土地註冊處公佈本月首20日全港物業買賣註冊登記數目達1.12萬宗，有預測認為全年物業買賣成交宗數可突破14.5萬宗，即係較去年上升50%過外，反映樓市復蘇潮已漸從豪宅擴散至中小型住宅；美聯集團（1200）日前創出12.40元新高後，股價步入整固期，但走勢仍見強韌，圖表走勢亦似營造旗形，可候11元邊吸納，中線目標15元。