到底係忌廉哥都冇佢咁好戲，定係為求拍劇毒死貓？唔係咁草菅貓命嘛？

事緣今天淩晨，有網民截咗幾張正在熱播嘅內地劇集《精忠岳飛》嘅圖片，場戲係講劇中人為證明菜裡有毒，所以搵隻貓試毒。結果隻貓(波斯貓)真係被毒死咗。

唔知係隻貓演技太逼真，因為佢中毒之後，真係不斷抽搐，狀甚痛苦，難怪有觀眾同網民睇完之後，覺得《精忠岳飛》劇組真係為咗個劇而毒死貓。唔少網民都好嬲，紛紛轉貼呢個post，要求劇組解釋。

事件越鬧越大，唔少網民係咁喪鬧，終於，吳卓羲舊愛——張馨予，即主角之一，發微博闢謠，話隻貓唔郁，唔係真係死咗，而係用咗麻醉藥。拍戲時，貓咪嘅主人都喺度。至於貓咪的幾次抽搐，係工作人員用手配合出來」的效果。

睇番條片，何止「用手配合」？根本就係有個人好明顯咁抽隻貓嘅後腿扮顫抖。隻貓之前已交咗戲抽搐0架啦，使唔使仲要係咁chok佢隻腳再顫多幾嘢嘛？

張馨予並寫道:「請不要拿著愛心當成罵人的理由，沒有弄清楚狀況前，不要去指摘你不瞭解的人。」不過，亦有網民火速留言: 「貓貓麻醉後是雙目圓瞪，舌頭伸出，電視裏這只貓貓眼睛半閉，瞳孔放大，第三眼瞼都出來的，儍子都能看出這是生命虛脫的表現！既然貓貓還活著，麻煩請主人帶著貓出來澄清一下！而且這只貓貓髒成這樣，到底是否有主人尚屬未知！」

亦有人話: 「我見過很多貓麻醉，我寶寶做絕育，麻醉的時候，眼睛睜的很大，美瞳全打開，醫生還要給她塗眼藥膏，怕她眼睛乾燥，根本不是劇組圖片裏瞳孔渙散，眼瞼脫出，死氣沉沉的模樣！」

方才張馨予再於微博貼文，寫道:「終於知道，對於有些人，根本沒必要澄清和解釋。不管你說什麼，就是罵，罵，罵，罵可以改變這世界，拯救這世界。希望罵，真的可以拯救你自己。」

不如就請各位愛貓之人都睇一下條片，評斷一下。其實，如果喺香港，即使冇保護動物嘅法例，但你至少可以肯定，無論拍戲定拍劇拍mv拍廣告，都唔會為求逼真同交到戲，而去毒死一隻貓，或者一隻狗，及任何生物。當年有港台導演拍劇，鏡頭交代要殺龜殺生，結果該導演被告虐畜，罪名成立。

是否只有喺內地，先至會令人懷疑甚至相信，為咗個劇而殺死一條寶貴生命？



有片:(片段令人不安，敬請留意)
http://video.sina.com.cn/p/ent/v/m/2013-07-27/175862718001.html