現年20歲女星杉咲花雖然樣貌平凡，但年前憑住夥拍宮澤理惠電影《幸福澡堂》橫掃多項最佳女配角及最佳新人，令佢短時間即成影視界搶手貨。

杉咲花會在7月上映嘅真人版電影《BLEACH》（死神）中飾演女主角朽木露琪亞，而佢亦擔正經典少女漫畫《花樣男子》續集《花過天晴 花男Next Season》嘅全新日劇於4月17日起開播，TBS電視台昨日已公開首個宣傳片。杉咲花將長髮剪短飾演女主角江戶川音，新劇故事舞台發生喺上作《花樣男子》嘅F4等人畢業後兩年，本來係千金小姐嘅江戶川音經歷爸爸生意失敗，被逼喺英德學園返學，而今次劇中會有稱為C5嘅四男一女新團Collect，尊尼仔組合King&Prince主將平野紫耀演男主角神樂木晴，其情敵馳天馬就由中川大志飾演，仲有濱田龍臣、鈴木仁、中田圭祐、今田美櫻、飯豐萬理江等參演。

精選娛聞，喺晒《娛果》
http://fb.com/appledailyent