46歲日本男神木村拓哉同香港天后王菲嘅女兒竇靖童首次合作，日前為某服裝品牌拍廣告，今日廣告片喺網上曝光，木村同細24年嘅童童鬥跳舞，兩人在東京JR一架列車內彼此打量，童童向木村挑機問：「最近沒跳舞吧？跳一個看看。」木村即刻chok爆除黑超，展露一個好鬼寸嘅笑容。

童童亦除耳筒嚴陣以待，隨着音樂節拍起舞，兩人在列車內盡情地跳，握住扶手柱各自轉咗一圈，46歲嘅木村仲用扶手吊環表演一招凌空360度後空翻，果然寶刀未老，童童都睇到拍晒手，讚咗句：「還成吧！」之後得戚嘅木村將童童迫埋角落，用手摸童童嘅頭髮，童童一手推開木村，兩人再埋身鬥跳。

木村繼續表演交叉腳舞姿，22歲嘅童童都不甘示弱，不停咁跳舞，跟住兩人又利用扶手吊環玩打鞦韆，鬥到不分上下，最後跳罷兩人離開車廂，木村抵死話：「你好麻煩！」童童笑答：「怎麼不早點說！」

精選娛聞，喺晒《娛果》
http://fb.com/appledailyent