前藝人、男模、游泳教練、楊凡愛將、周海媚嘅舊愛...一連串嘅稱號，對o依家嘅林偉亮嚟講，已經屬前塵往事。

曾全裸拍三級片《妖街皇后》、喺《古惑仔》系列電影扮演「恐龍」一角嘅林偉亮，於09年看破紅塵出家為僧，法號果宏釋衍偉，據知目前喺由李嘉誠基金會撥捐20億興建嘅大埔慈山寺修行，擔任知客法師，負責弘揚佛法，袁詠儀、伍詠薇夫婦、查小欣都曾到慈山寺聽衍偉法師講佛經；佢仲係慈山寺籃球隊嘅隊員，曾經同方力申、張繼聰、鄧穎芝等打波，藉運動弘法。

嚟緊呢個禮拜六（16日），衍偉法師就踏入42歲，早前本報曾聯絡法師，想了解佢由藝人至出家嘅心路歷程，衍偉法師以短訊婉拒：「多謝您的訪問邀請。出家在寺院的生活主要以修行為要，而且寺院亦有法師守則要遵從，我出家日子尚淺，不宜作個人宣傳，希望你諒解。阿彌陀佛！」

至於曾同衍偉法師打過籃球嘅鄧穎芝喺電話表示：「我有同佢哋打過波，我同法師唔熟，但認得佢以前有拍戲，佢以前係長頭髮，不過唔知佢拍過三級片。佢冇同我哋分享過心路歷程，但佢個人好得意好搞笑，同埋真係好少見到啲法師，可以同其他人融為一體，好開心咁打籃球。」

方力申就喺網上分享同法師合照，留言：「大熱天時，身穿長長法衣的衍偉法師毫不留力為大家講解慈山寺的建築及人生感想，力申感激不盡！」」袁詠儀（靚靚）更曾帶囝囝魔童與伍姑娘等好友到訪慈山寺，靚靚貼相並致謝：「知因識果，保持正念，世界才會變得安樂和諧。這裡充滿靈光和清淨。謝謝衍偉法師生動的講解，慈山寺工作人員的悉心安排。」有網友到寺院時認出大師，合照並留言：「我哋仲聽咗衍偉法師既佛學talk show，睇睇下覺得佢好熟面口，原來佢就係林偉亮，有趣有趣！」