何佩瑜（Jeana）近日參演港台劇集《人間有情之蘋果的故事》，佢收起咪咪，抹走靚妝，變身樸素洗碗女工，原來佢今次係扮演一位基層單親媽咪，有個6歲囝囝，兩母子相依為命，由於身世坎坷，壓力好大，搞到思覺失調。

呢個角色對Jeana嚟講係新挑戰，佢今日接受《蘋果》電話訪問時話：「我從未接觸過呢類角色，接到劇本時，我有同男朋友（翁子光）商量，佢好支持我作新嘗試。」Jeana話呢次第三次扮媽咪，佢大讚今次個螢幕囝囝好乖：「佢好識o氹人，成日請我食零食，我就送番玩具俾佢。」

Jeana話為咗演好呢個角色，佢事前特別去茶餐廳後巷視察，睇吓洗碗女工開工情況偷師。問到導演男友翁子光有冇教路點樣揣摩角色？Jeana話：「有呀，佢畀咗好多意見，我個角色有一場戲幾激動，佢教我可以誇張少少去演，其他場口要演平實啲，否則會over咗。」Jeana自爆翁子光有去後巷探班：「佢嚟係冇壓力，反而我個心定咗。」Jeana個洗碗女工造型好簡單，毫無性感可言，佢講笑話：「所以男友叫我快啲接拍囉。」