老董臨落台,由於陳太嘅陰影,恐懼政務司司長功高震主,將當奴升上神枱,架空埋,並叫佢做清潔大隊長,叫佢揸把掃把掃街!
政務司司長變咗「真冇權」,叫兩司十一局,直接report畀特首,以為咁就可以實施「強勢行政主導」!點知高官問責,愈問愈冇責,以前殖民地政府,布政司係大內總管,強力統籌協調各部門合作,老董想學朱元璋,廢宰相,中央集權,又唔知自己優柔寡斷、樣樣嘢拖住唔批,各部門阿頭見到咁,就各自為政,政務司司長揸咗掃把,老董亦逐步隱形,各個部門山頭,各個政務官阿頭,都做咗特首!
例如尖沙嘴巴士總站大搬遷,話要開闢一個「羅馬廣場」,事關重大,因為交通大兜亂,隨時搞到半個九龍大塞車!因為將來可以進入呢個自稱係「羅馬」、實際上係菲傭文娛中心嘅「廣場」嘅巴士線,大幅削減,搭天星小輪嘅上到岸,要行到冇雷公咁遠至有巴士接駁,八成路人反對咁嘅擾民惡政!