范冰冰很忙!第66屆康城影展法國時間15號開幕，雖然今年冰冰有小小失手，未能搶盡風頭，不過法國時間昨晚開始佢就馬不停蹄，先出席品牌頒獎禮，以一套同張雨綺有9成似嘅DeepV長裙現身挑機，算係打個平手。

不過之後佢又同成龍連走兩場，先喺遊艇攬到成龍實一實，連體嬰咁影相，後來又去咗海邊，都係為佢兩個主演嘅合拍片《Skiptrace》宣傳，冰冰特別著上好有假日風情嘅格仔裙亮相，不過現場好鬼大風，冰冰一直就要扮已故性感女神瑪麗蓮夢露（MarilynMonroe）嘅經典動作，彎腰按住裙襬。

不過當成龍想踩上石級之際，竟然嚟咗一陣怪風，就係咁，吹起咗冰冰條裙，令佢春光乍洩，露出充滿鄉土氣息嘅肉色三角內褲，呢一刻就被台灣《蘋果日報》獨家拍到。

對於走光，冰冰覺得有點醜怪，仲開玩笑話：「我要告訴他(裙子設計師)，都是他的裙子太輕了，害我走光。」




周五隨《蘋果日報》附送嘅時尚美容雜誌《add》第三期雖然早已派完；拎唔到書嘅朋友，可以上番《add》嘅官網 http://add.appledaily.com睇番足本網上版，除咗有何超瓊專訪，仲有好多時裝靚嘢睇！