【李八方online】港台回歸劇《廿年》揚威國際
港台李八方《廿年》
香港電台第一台嘅回歸廣播劇,有李柱銘、田北俊、李麗娟同陳婉嫻等猛人傾力聲演嘅《廿年》,最近喺亞太廣播聯盟廣播劇節(ABU SONIC Radio Drama Festival)中勇奪長篇廣播劇組別大獎(Long Form Drama-Winner),更喺來自多個地區、逾40部作品中脫穎而出,攞埋年度大獎(Grand Prize),巴閉之處係,港台係本港唯一奪獎嘅廣播機構。
《廿年》點解跑出?大會評審讚揚製作團隊以獨特原創方式,透過描繪香港典型家庭嘅日常生活,講出香港回歸前後嘅標誌性歷史,同時指《廿年》選用嘅歷史聲音檔案、音樂同寫實嘅對白設計,多角度呈現香港現況。《廿年》嘅製作團隊對獲獎好鼓舞,多謝聽眾支持,強調獲國際認同,港台亦引以為榮。
《廿年》現逢周日凌晨2至6時,喺港台第一台《周末午夜場》節目時段內播出,大家亦可以喺港台網站(radio1.rthk.hk)及流動程式RTHK Mine收聽及重溫。