區文詩今日喺新城宣傳新歌《盲婚論嫁》，仲將宣傳用嘅唱片整到成張請帖咁。問佢幾時真係派帖，Angela就話照計應該係好姊妹Stephy先，自己同男友有晒共識，唔結婚都冇問題。

不過問到知唔知另一位姊妹Kary嘅戀事，佢就爭啲講漏口，又話：「同佢有keep住聯絡，不過佢哋都未同時出現過，但係大家都應該唔使等好耐喇。同佢做咁多年姊妹，知感情狀況都好正常嘅﹗」似乎真係知道好多內情咁啵。

雖然新歌推出，不過今年一開始Angela就頭頭碰著黑，今日佢抱住隻黑色玩具貴婦狗仔一齊去電台，原來狗仔之前斷咗腳，佢話：「半夜帶完狗仔睇醫生打石膏，第二朝就同外傭爭拗，最後就畀一個月通知期佢離職。當晚返到屋企竟然發現佢夾硬拆甩狗仔嘅石膏，仲想衝埋嚟襲擊我，好在助手在場，最後報警仲要7個差人先制服到佢。後來醫生打比我，話佢精神有問題。」