【茲事體大】國寶級馬后幾時跑 練馬師發聲明
華禮納蘭域馬場布文雲絲仙子阿波羅錦標Chipping Norton Stakes3月3日
累積22連勝的澳洲特級馬后「雲絲仙子」本來預計復出戰,會係2月17日蘭域馬場二級賽1400米阿波羅錦標。
但好衰唔衰,其最佳拍檔OK哥布文早前於新西蘭愛莎妮馬場出賽時,因犯規被罰停賽至今個月21日,搞到澳洲馬圈連日不斷傳出會有其他騎師沾手「雲絲仙子」,流言滿天飛!
終於「雲絲仙子」練馬師華禮納剛周二(6日)宣佈馬后將唔跑阿波羅錦標,反而進軍3月3日一級賽澳洲Chipping Norton Stakes,意味着「雲絲仙子」將與OK哥布文繼續並肩作戰。
為咗遷就正值停賽的布文,一如華禮納早前咁講,唔想將一個重要任務交俾其他騎師,萬一輸咗會令對方承受巨大壓力。
華禮納亦表示布文對「雲仙絲子」嚟講非常重要,而「雲絲仙子」唔跑阿波羅錦標都冇害,只要試多課閘,然後跑一級賽,在部署上都冇太大問題。
外國馬迷收到消息後,反應走向兩極,有啲話「決定得好!」,有啲就話「佢咁講係咪代表澳洲冇騎師好得過布文?」,甚至有馬迷覺得呢件事好「匪夷所思」。