【真係好驚喜!】張栢芝幫許廷鏗拍片拉票 殺入叱咤10強撼古天樂
拉票張栢芝許廷鏗
上月傳出為新加坡富商生B嘅張栢芝,雖然一直未有回應生B傳聞,但栢芝產後就不時出現喺社交平台,繼月頭飲食作家Bonnie上載咗張喺遊艇會同栢芝嘅合照後(新聞連結: https://bit.ly/2RUFjoW ),剛過去嘅星期日(9日),栢芝去參加大埔康樂園寓所嘉年華時又被網民野生捕獲 (新聞連結: https://bit.ly/2SKRbdd ),而今日,栢芝又出現喇,而且最爆嘅係,佢竟然係幫許廷鏗拍片拉票。
許廷鏗今晚就喺ig度,post咗一條幫自己首《停半分鐘聽一闋歌》拉票嘅片,不過勁就勁在,佢竟然搵嚟張栢芝一齊拍片,片段中嘅栢芝戴住一頂紅色Cap帽,栢芝睇落非常精神,塊面冇之前兩次咁腫。片中先由許廷鏗讀出《停》嘅其中一句歌詞:「無暇在鬧市裏」,然後栢芝就幫佢講埋下一句:「停半分鐘聽一闋歌」,之後栢芝就攞出一張寫住歌名嘅紙仔,然後再講「許廷鏗」。而睇得出搵到栢芝幫手嘅許廷鏗亦好開心,大叫「Yeah」。
而搵到栢芝幫手嘅許廷鏗就寫住:「周末驚喜!重量星級嘉賓拉票!慶祝殺入十強!」之後再hashtag埋「#我最喜愛的歌曲最後10強 #多謝支持啊 #冇辦法啦 #對手太強喇 #古天樂先生又出現啦 #我最期待的畫面 #順帶一提 #佢真係有聽我啲歌 #我都估唔到 #仲要係第一隻碟開始聽 #識唱螞蟻嗰隻 #唔通又係由細聽我聽大 #唔好玩啦」。
精選娛聞,喺晒《娛果》
http://fb.com/appledailyent
搵到栢芝幫手拉票,許廷鏗亦表現得好興奮(ig截圖)