每年六大宗教領袖都會趁新春前夕，發表新春賀詞，今年賀詞唔單止叫香港人加倍努力，務實進取，仲加多一句「自求多福」，其實佢哋要港人靠自己，不無道理，環顧今時今日嘅香港，香港人唔通仲唔自救咩？
話說每年宗教賀詞都環繞過去一年香港最熱門話題，今年就揀咗政改、社會分化同埋青年人品德三大問題。賀詞話政改要成功，必須要選賢與能；又話香港社會正面對意見分歧，港人要化分歧為合作。六大宗教領袖亦認為，政府應加強青年人品德，等佢哋能夠明辨是非。唔知特首梁振英早前批評宗教界零經濟貢獻，算唔算明辨是非？