資深攝影師陳國雄因為拍攝一場成龍新片《絕地逃亡》一場跳海戲，今日凌晨時份不幸於欣澳溺水亡，令人惋惜。

黃秋生心痛之餘，亦於fb撰文望業界能正視問題:「拍戲反艇搞出人命，確係一個悲劇，但係行家們，呢種玩命嘅無知幾時先會停，我真心真心希望無論海陸空，呢種情況唔會再發生，睇到令人好唔開心。根本就唔應該八個人上隻舢舨，有艇家都會話你知危險，肯定拍嗰陣六七個人坐喺船頭，船頭過重就反艇。又冇另一隻救援船，又冇潜水員。香港電影咁多年都係咁，唔死又過多日，夠啦！」

在發生意外後馬上由附近廠房休息的成龍，在意外後即衝到岸邊了解，惟最後仍未能及時救回高佬，自責無能。及後黃秋生再接受本汾報電話訪問時就說:「當然係悲劇，但呢個悲劇可以避免，咁多年嚟，大家都用趕、快做藉口，冇可能嘅事嚟0架嘛！你夜麻麻出去，嗰隻咁嘅舢舨，八個人喺上面，一定係超載；第二，我哋梗係知佢拍乜啦，你梗係拍船尾啦，唔通你拍船頭咩？你一定攝影師成crew人聚晒喺船頭，呢個係commonsense，船頭聚人一定沉。」

秋生再說:「呢個真係可以避免嘅意外。啲人拍戲成日俾excuse(借口)，話拍戲係咁0架喇。唔好話船，其實海陸空都會發生意外。其實俾多少少時間，做好少少安全措施，所有意外都可以避免。真係希望業界要重視呢個問題。點可能冇另一隻艇喺隔籬做救援？一啲危機意識都冇，以為拍慣大家係咁樣就算。雖然我同高佬冇合作過，但聽到都心酸，希望電影會要訂規則，拍危險戲要有指引。」

導演陳木勝對高佬意外身亡亦感到悲痛難過：「我哋合作過好多戲，《新警察故事》、《掃毒》、《寶貝計劃》等等，多到數唔晒。佢同另一個攝影師潘耀明孖住拍檔，所以有潘耀明嘅戲佢都喺度。佢係一個非常踏實、勤奮嘅人，做算做嘢點辛苦都一樣咁落力，真係好傷心。」

陳木勝續道:「朝早聽到消息好難過，即刻打電話去問潘耀明，大家都無言，依家已經傾緊點幫佢屋企人搞身後事，同點樣捐帛金幫佢哋。」他又表示不了解高佬是否不諳泳術：「我有打去問，好想了解成件事係點發生，但冇人講到俾我知。」