四年一度嘅奧運，連平時冇乜留意運動嘅香港人都學人跟吓風，不過肚入面冇墨汁，又想博sound bite，咪評述單車當賽馬咁玩，話香港乒乓球運動員係茂利囉。雖然呢位女性電台節目主持人話正字係「瞀里」，仲堅持自己經常用「瞀里」稱呼朋友，不過點都好，都反映呢啲反智嘅節目，只適合一啲冇進步嘅香港觀眾同聽眾。
就好似中國泳手傅園慧，大家都討論佢賽後嘅得意訪問，甚麼「洪荒之力」，甚麼「內心有一匹野馬，我拉不住」。其實傅園慧就係用儍大姐嘅對答減壓，佢賽前出現腰椎盤凸出，唔好話游水，一般人連坐都坐唔到，但佢仲要參加奧運，最後都拎到銅牌。

逆境自強故事，除咗奧運，喺英超都見到。曼聯揭幕戰旗開得勝，最值得開心應該係中場桑馬達。講真，摩連奴接手曼聯，相信大家都估計第一個踢走嘅，就係呢位西班牙中場，事關摩連奴執掌車仔時期，已經批評佢冇防守又跑得慢，之後仲放佢去曼聯㖭。
嗱，桑馬達喺曼聯仲有冇前途就未知，不過佢起碼比贊奴沙、麥尼亞等遲走，唔係第一個被踢走先吖。坦白講，你話桑馬達慢，其實成隊曼聯都係慢㗎啦，表面好似輕取般尼茅夫3:1，但其實未入波前，埋門都係唔多。
或者雲高爾呢兩年間植入嘅控球在腳DNA太勁，小弟睇唔到暫時曼聯踢法有咩突破性改變。咁慢又唔係唔好嘅，如果右路換個跑得快嘅新兵，好似沙迪奧文尼同利萊辛尼咁，朗尼、伊巴謙莫域呢啲老兵，咪又係跑唔郁跟唔上，所以大家應該接受，曼聯新一季都係慢慢地贏㗎喇，啱晒桑馬達啦。文：牽牛