喺桌球檯上打出一棒147度係唔少球手夢寐以求嘅事，五屆世界冠軍奧蘇利雲生涯曾經13次做出呢個成績，喺桌球壇無人能及。「火箭」喺1997年桌球世錦賽用咗5分20秒就打出147，更加係一項紀錄。趁桌球世錦賽今日開波，英國《BBC》就幫奧蘇利雲計咗條數。

首先，要打147，一位球手要出Q36次，以「火箭」5分20秒、即係320秒嘅紀錄嚟計，佢每Q只係用咗8.8秒，四捨五入當9秒就好計啲。喺賽事打出一棒147度，如果係獨得嘅話，獎金有147,000鎊（約170萬港元），外加賽事最高度數獎金18,000鎊，總數即係165,000鎊。將呢個數除以出Q次數（36次），即係奧蘇利雲當年每打一Q就袋咗4583.33鎊；如果將獎金數除以320秒，佢每秒就賺咗差唔多6,000港幣！