韓國名導奉俊昊執導、男星宋康昊、李善均等人主演的韓片《上流寄生族》，於今早舉行的第92屆奧斯卡電影頒獎禮中奪得最佳電影、最佳導演、最佳原創劇本及最佳國際電影4個大獎，創下奧斯卡的新紀錄。

頒獎禮結束後，奉俊昊率領宋康昊、李善均、崔宇植等一眾台前幕後受訪，對於《上流寄生族》成為大贏家，奉俊昊笑言：「仍然未有實感，需要啲時間去整理自己嘅心情。（獲獎）最後一刻所有演員、工作人員一齊上台，好似為去年5月康城影展展開嘅旅程中，畫上最完美、幸福嘅句號咁。」而《上流寄生族》寫下新歷史，成為首部外語片勇奪最佳電影，奉俊昊坦言：「現時只想感受當下嘅喜悅，關於電影能夠創下新紀錄一事，之後應該有人會從多角度、深入地進行分析，不過我亦想問問海外觀眾喜愛呢齣電影嘅原因。」

奉俊昊憑《上流寄生族》再攀上事業高峯，其新作亦相當受到關注，他表示有兩齣新作早已準備中：「兩齣新作都並非大規模製作，早於兩年前已開始着手準備，目前仍然做緊籌備工作，一齣係韓國電影，在首爾發生的恐怖事件，另一齣係英語電影，以2016年倫敦發生嘅真實事件改編，當一切準備好會再公開更詳細內容。」

四度跟奉俊昊合作的宋康昊受訪時，亦大讚對方在電影中表達出的現實主義越發成熟。被問到會否五度跟奉俊昊合作，宋康昊笑言：「好難講，因為太辛苦喇。（《上流寄生族》中）要行好多樓梯，又要淋雨，又要住喺地下室，如果係舒舒服服、好似李善均片中咁嘅角色，都會考慮下。」引起爆笑。

-----------------------------

《果GYM》隨身播 　健身壹App過！