當年今日
關於我們

【逆權運動】Tommy仔想同林鄭傾警員濫暴:點解去到一個冇人性嘅表現

蘋果日報 2019/09/05 18:29

阮民安Tommy仔

由反對修訂《逃犯條例》演變的「逆權運動」已近3個月,經歷了6.12、7.1、7.21、8.31等事件,縱然特首林鄭昨天宣佈撤回「逃犯條例」,並提出4項行動,但堅拒成立獨立調查委員會,又無視其餘4大訴求,大家當然不「收貨」。
在今次的逆權抗爭中,藝人何韻詩、葉德嫻、黃耀明、王宗堯等一直站在前線支持,紛紛為「反送中」運動發聲,Deanie姐日前更聲言不會跟年青人割席。阮民安(Tommy)今天更獲邀到樹仁大學的罷課集會進行分享,Tommy接受訪問時說:「佢哋上星期邀請我嚟支持同分享,我第一時間答應,我覺得兄弟爬山,各自努力嘅一個情況下,每個動作都係對呢個運動嘅一個支持,所以每一個行動我能夠參與或者需要到我嘅話,我都會盡力出席。呢個係第一個,之後有唔同嘅大學甚至係中學都有邀請我去分享,抽到時間我一定會出席。」
他續說:「我之前去過好多合法嘅遊行同埋集會,自己都喺網上平台做文宣打氣,每個人有唔同嘅崗位,我就係分享自己做嘅嘢,我最主要係想分享,呢件事已經差不多3個月,大家有傷心、有憤怒、有失望,大家去到一個位置要放鬆吓,尤其係我哋做藝人,能夠做到嘅係希望帶番啲娛樂畀大家,係好重要。我8月31號去咗銅鑼灣busking,大家係好開心,但之後又變天,又催淚彈又水砲車,但起碼喺嗰40至50分鐘入面得到少少放鬆,我有諗係咪要做多啲嘢呢?最近都收到唔同嘅inbox,話唔開心、好大壓力,想自殺,其實我不停用文字去支持打氣,我有諗仲可以做啲乜嘢呢?所以我計劃搞一個音樂會,年輕人做咗好多嘢,希望可以畀年輕人娛樂一吓,呢個騷小學、中學同大學生完全免費入場,在職人士就會有個97價,可能280至380蚊就可以睇騷,目標係希望年輕人可以有一刻嘅娛樂,我覺得呢個時候睇得多啲畫面係會好繃緊,希望大家可以有放鬆嘅空間。」
如果真的開始籌備演出,可會擔心因過往的言論在找場地,特別是政府場地時遇上留難?Tommy說﹕「我真係有諗過,如果唔關政治事,只係單純一個娛樂嘅活動都出現呢個情況,咁就另一個白色恐怖,當然要另找唔係難,仲有好多地方可以選擇,例如露天或者其他私人地方。」
提到林鄭的4項行動,Tommy直言不會收貨,他說:「梗係唔收貨啦!我諗支持呢項活動嘅人都一樣,佢喺度語言偽術,噚日講動議,但係今日又講番撤回,五大訴求、缺一不可,相信大家都冇變過,佢話撤回但係太遲啦,佢應該係6月9號講,呢幾個月就唔會演變呢啲事。其實唔單止逃犯條例,原來香港每一個政府部門都咁腐敗,去到呢一刻除咗逃犯條例、五大訴求之外,相信仲有好多訴求,係需要去解決先可以停落嚟,相信仲有一段時間,所以大家要繼續堅持、加油,但係都要畀空間自己休息。」
問到林鄭表示會落區聽取民意,Tommy表示願意跟特首對談,他說:「我覺得落區都係落返自己嗰啲區啫 ,有機會都想同佢傾吓,好簡單㗎咋,而家落嚟都得,佢所謂嘅落區都係大龍鳳啫,就算搵兩個人加入監警會嘅都係自己人嚟,所以我覺得真正想聽民間訴求,就是但搵一晚落去集會嘅地方,或者每間大學是但一個地方,都可以聽到真正嘅民意,睇下佢夠唔夠膽咁做。」問Tommy想跟林鄭傾甚麼?他說:「其實好想問吓警員濫暴、拘捕市民,呢啲行為係咪你去支持嘅呢?點解可以去到一個咁冇人性嘅表現?究竟係邊個畀權力或者命令佢哋咁樣做嘅呢?呢啲係好冷血嘅行為,希望特首可以正面答我,唔好耍我。」

採訪:羅慧敏
攝影:陳慧安

-----------------------------
【撐學生】
召集有心人 撐學生全年睇《蘋果》
立即按此
empty
(攝影:陳慧安)
empty
提到林鄭的4項行動,Tommy直言不會收貨。
empty
林鄭將會落區聽取民意,Tommy表示願意跟特首對談。
empty
Tommy計劃搞一個音樂會,希望可以畀年輕人娛樂一吓。