駐港解放軍近日插手搞香港青少年軍，令港人對解放軍嘅印象越嚟越差。八方懷疑呢一股不滿蔓延到專業界，因為噚日喺城規會見到一份直接挑戰解放軍嘅申請，就係將中區軍營（圖）申請由軍事用途改劃做酒店用途！
呢份咁驚人嘅申請由智仕顧問有限公司提交，申請表就列出八大理由支持改劃用途，解釋喺商業中心區起軍營係殖民地震懾人民嘅做法，𠵱家香港回歸咗冇需要咁做，酒店比軍營更適合中環；其他理由仲包括可以擴闊夏慤道，同埋如果搬走軍營，中環海濱就唔再需要軍事碼頭，可以順便重置埋皇后碼頭㖭。

退休政府規劃師提出

八方開頭都以為呢個申請係本土派巴打嘅高技術惡搞，不過搵到智仕顧問嘅老闆薛國強，就發現佢原來係喺政府做咗三十年嘅退休政府規劃師，佢話自己絕對唔係反對解放軍，只係從規劃角度提出意見，同政治立場無關；又強調自己冇代表發展商，薛生話自己喺舊年九月已經遞交咗申請，城規會一直拖咗幾個月先正式公佈，佢懷疑城規會係咪私底下諮詢解放軍，「如果解放軍反對，咪喺正常程序提反對意見囉！」
公共專業聯盟黎廣德就話，土地規劃屬於香港本地事務，城規會有權改劃，但係改劃咗都唔等於軍營要搬，因為軍營用地釋放民用始終要中央批准，但係就可以趁呢個機會向發展局局長陳茂波追數，因為佢之前承諾檢討軍事用地，但就一直冇聲氣，今次佢屬下嘅規劃署就一定要就呢單申請表態喇。