為搶客，「魔童」王維基可以去到幾盡？佢最近故技重施，用番以前搞長途電話生意sell客嗰招，搵來一班「着數專員（Jetsoers）」擺街推銷（俗稱街霸），吸引街客去佢嘅港視（1137，HKTV）網購。
華華噚日行經九龍灣，見到有個青BB嘅街站，同埋着住HKTV制服嘅工作人員（着數專員），再走埋去八卦，先知道港視最近開始擺街霸sell客。

登記即有50蚊優惠

呢位着數專員會直接教人裝App網購，即場裝App就會送上一包果仁零食或一塊面膜。如果街客用着數專員提供嘅優惠號碼，去HKTVmall網購，就可以得到50蚊優惠；街霸又會提供特價貨品優惠，主要係家庭用品。着數專員如果成功游說街客網購，即係開單喇，就可以分到佣金，幾多就冇人肯講嘞。
喺九龍灣呢位着數專員話，一日都有10至20名街客肯用優惠號碼網購，甚至有人主動走埋去問有乜優惠。
港視方面就話，公司之前喺港鐵（066）做過宣傳，市民對佢哋有初步認識，所以𠵱家就用着數專員針對唔同地區吸客。
聞說港視街霸最近會喺九龍灣、上環、美孚等地區擺檔，本周六會去天水圍一帶宣傳，港視仲希望當日即場網購，可以做到即日送貨。果然係橋唔怕舊。

話你知：首創街頭拉客上台

「魔童」王維基當年硬撼壟斷市場，創立CTI（港視前身），用長途電話回撥功能拉低收費，今時今日成條街都係嘅「街霸」，都係由王維基諗出嚟。
話說，CTI成立初期曾諗過開舖頭，但間舖冇嘢賣，只係為咗畀客戶登記上台用長途電話，要租舖頭似乎有啲嘥。於是就喺一間大型連鎖店，租個位開個櫃枱收客，慳成本之餘反應又好好，成為街霸雛形。
之後街霸由舖頭走上街，旺角西洋菜南街與深水埗黃金商場成街都係電訊商易拉架廣告，一邊拉客，一邊又要同食環署大鬥法，隨時走鬼冚旗，街邊賣電訊plan甚至成為香港特色。玩到咁墟冚，難怪魔童重施故技拉客網購。

李華華
mailto:[email protected]