當年今日
關於我們

【垂死黑貓】企定定喺降班區219日 莫耶斯拒絕投降

蘋果日報 2017/04/10 06:56

曼聯新特蘭莫耶斯

就算「黑貓」喺傳說中有9條命,幾多條命都救唔番新特蘭同莫耶斯?計埋周日英超領軍主場淨吞曼聯3蛋,新特蘭聯賽7戰不勝之餘更係0入球失14球,目前31戰得20分敬陪末席兼距離護級線10分,難得去年7月上任嘅莫耶斯經歷埋「掌摑門」依然保住烏紗,賽後揚言拒絕提早投降,誓要領軍拼至最後一刻!
新特蘭喺周日英超守至30分鐘俾伊巴謙莫域攻破大門,之後仲有施巴斯坦拿臣直接領紅被逐,更加無力回天,最終淨吞3蛋。英國《BBC》更統計指,今季英超過咗240日,新特蘭喺當中219日處於降班區,更有147日坐正包尾位,咁樣落去仲有咩希望?不過,莫耶斯依然口硬:「我唔覺得(冇機會護級)。我哋嘗試爭取入球,喺避免大敗下奮力進攻,呢個就係我哋嘅精神。呢場比賽係難踢,因為我哋大部份時間打少個,我哋嘅處境的確艱難,但下一仗繼續喺主場出擊(vs韋斯咸),睇吓我哋可唔可以贏波,從而展開新一頁,我哋只會喺數字上有定案先接受命運。」