環球股市大玩逆向思維，進一步反映邊個有資金就邊個話晒事，大戶辛辛苦苦自5月底低位買上嚟，冇功都有勞，你冇心機守落去掃番出街嘅貨，俾邊個索晒根本唔使多講。
好多人會覺得冇理由個市仲有得升，點知就係咁喺短短十幾個交易日同你挾足千六點。
中國7月份PMI降至51.2嘅17個月低位，增幅明明連跌3個月，被解讀為經濟溫和降溫；進口指數跌穿50，被認為係有利紓緩通脹，股市即時聞雞起舞大炒宏調鬆綁。國家信息中心預測第3季中國經濟增長放緩至9.2%，貨幣政策要適度寬鬆，信貸政策則要有保有控；比亞迪股份（1211）年銷售目標卻要減20萬輛，因第二季度銷量明顯下滑。

谷升派貨呃散戶入市

睇見上述數字好難說服自己奮勇入市，只係A股點解周二插水，明顯係呃到人呃唔到自己；點解周三又升番少少，明顯又係未散完貨唔敢一跌到尾Chok住嚟派嘅格局。
中美兩大經濟體某程度上係唇齒相依，可惜美國經濟亦唔見得好幾多，7月份製造業指數55.5，反映擴張速度繼續放緩；第二季GDP見2.4%差過預期，反映經濟增長明顯放緩；加上格老指美國經濟似置身於「半衰退」狀態，伯南克又形容經濟「異常不明朗」，蓋特納亦話美國失業率將會先回升才再下跌。
穆迪開到聲呼籲美國盡快定出削赤計劃，否則或會遭降級；上月底富國、美銀及花旗三大銀行前景評級更已被其下調至負面，美股之反覆向上唔知係升乜，話股市係領先指標，不如話係大戶設局玩逆向思維擾亂市場秩序。
假如大市要呃你呃到底，介乎21800至22100嘅熊仔就真係凍過水，塘邊鶴越係覺得唔可以再錯失升市要跳火圈之時，升市任務至大功告成，最厲害手段係沽貨計賺錢數時，順手沽空補多一槍。

胡孟青
作者為獨立股評人