培訓專家Ｗ在銅鑼灣農圃請食飯，交流培訓心得，左丁山邊度識培訓吖，只識齋talk，美其名曰分享經驗。培訓Ｗ話訓練不同人物，如果能夠預先弄清楚受訓人物嘅家庭背景，工作背景，會收事半功倍之效。問題係參加培訓班嘅，往往幾十人至百幾人，聽演講嘅有成千人，事先對聽講人士嘅背景不甚了了，所以只能講大路嘢，一啲廣泛被接受嘅準則。
培訓Ｗ以訓練動物為例，馴服隻狗要用狗索，索住隻狗條頸。馴獸師訓練獅子，要揸住條電鞭，水族館人員訓練海豚，用逐步操控法，當一條海豚第一次從海上躍起，餵佢一條魚，去到第十次，餵佢成桶魚。至於訓練頑皮馬騮，有乜方法？培訓Ｗ在廣西親眼見到馬戲團訓練猴子騎單車，隻頑皮星食完香蕉就周圍郁，係都唔肯騎，嗰位負責訓練嘅仁兄突然捉一隻公雞出嚟，捻住雞頸，喺猴子眼前引刀一割，雞血慢慢滴落地，猴子立即唔敢望，拚命騎單車，培訓Ｗ睇到咁嘅場面，發揮香港城市人嘅反應，驚呼一聲哎，一分鐘後，佢醒起古人成語殺雞儆猴，原來係有實證嘅，並非空口講白話。

培訓Ｗ話好多人嘅行為模式基本上從家庭父母兄弟之互動關係而來，經過十幾二十年Conditioning所致，唔係無端端發生嘅，對一位吸煙食丸嘅金毛仔講：「勤力發奮讀書啦，將來有前途，九成冇用，一位青少年之鍾意吸煙食丸，多數與家庭有關！」
培訓Ｗ跟過一位德國心理專家到中國治療家庭問題，發覺問題之大，不知從何做起，主因係毛澤東剷除仁義禮智信之傳統儒家觀念後，再經文革折磨，唔少同胞只崇拜權威與金錢，其他不理，如果開會時講幾句客套話：「請多多指教，包涵、包涵」就會俾人指到頭擰擰，眼光光，撞咗板都唔知乜嘢事。培訓Ｗ並非學院派，而係一點一滴累積經驗教訓而成為專家嘅，問佢點解會咁成功，佢話要先了解佢嘅家庭喎。