沙膽虹昨天手記引述肥佬黎一番話，指梁振英當選後一定會搞《蘋果》，《蘋果》唔使驚，一定要砌到底。文章出街，馬上收到一封署名《蘋果》忠實迷的讀者傳真信函，表示「很認同肥佬黎的一番話，亦百分百肯定『狼振英』會搞你哋。」
這封以「狡辯大王深不可測」為題的文章續說：「他（梁）有政治潔癖，不容有任何污點，《蘋果》又將他真實的一面如實報道，以他的報復野心，係人都知一定會搞到《蘋果》及……」接着他又提醒《蘋果》小心，「與他接觸最好錄音和有第三者在場記錄，如有與他談話的稿紙都要留低並要獨立開個file儲存，以免狡辯大王將你們的話反轉再反轉，一樣講得流利，可能是他砌低你們就真，到時你們都未知發生緊咩嘢事，哈哈。」
沙膽虹首先多謝這位《蘋果》讀者關心和提醒。至於他接下來話有少許覺得《蘋果》今次間接捉隻老鼠入米缸，事關之前日日頭條兼大幅報道唐英年和曾蔭權負面新聞，間接助梁推高民望云云，沙膽虹就不敢苟同。《蘋果日報》是社會公器，曾、唐、梁有醜聞，我們無分彼此照爆，不會因為不想梁當選就將曾唐醜聞playdown；現在要同梁砌過，亦因他將成為特首，而他很有可能做出破壞香港核心價值的事，《蘋果》責無旁貸，不得不站出來捍衞。
沙膽虹