【00:55】新增動新聞

「捉佢捉佢，報警！一入嚟攞嘢，我話小姐，一擰轉頭就掟罐啤酒、掟埋嗰支嘢，一腳批我！」將軍澳翠林商場一間便利店嘅女職員一路追一路嗌，讀者陳先生走上去了解同拍片。原來上星期四下晝3點左右，一個女人喺便利店懷疑偷嘢，被女職員發現喝住佢，佢向女職員掟嘢不突止，仲伸咗對方個肚一腳，跟住跑咗去，女職員追出商場外面大叫，一個男途人幫手捉賊將佢制服。

女賊畀見義勇為嘅男途人制服之後一直瞓喺地下，男途人鬧佢：「你唔好扮傻呀！啲街坊畀你恰嘅咩？人哋喺度打工咋嘛，你打人做乜！」個女賊就話：「對唔住，我講sorry！」男途人就話等差人嚟先講，有啲街坊圍觀，保安員都有埋去了解，在場人士報警。

警方表示，嗰個37歲姓廖嘅女人喺便利店偷咗一樽價值10蚊嘅鮮奶，同埋一本200蚊嘅雜誌之後走咗去，便利店54歲姓羅女職員追截，畀對方踢咗一腳，最後由途人幫手制服賊人。廖女涉嫌盜竊同普通襲擊被捕。之後疑犯同女職員分別送院治理。

你敢爆，我敢獎！ 立即WhatsApp《蘋果》24小時爆相爆片熱線 或致電：63836568