當年今日
關於我們

【李八方online】明年區選候選人 每票獲資助多1蚊

蘋果日報 2018/12/11 19:21

區議會

政府講說話好多時都係講得相當冠冕堂皇,但到實際做嗰陣,又係另一回事!話說出年就係區議會換屆選舉,咁當局就檢討、調整一下畀候選人嘅資助及候選人嘅開支上限啦,但政府鋪陳嘅理由真係令人滿腹牢騷。
講吓候選人資助先,依家參選區會嘅人,只要拎到5%以上選票就符合資格,資助額係每票14蚊、選舉開支一半、或者候選人申報嘅選舉開支,當然以最低者為準。政府建議將每票資助額加到15蚊,因為呢幾年嚟綜合消費物價指數升咗9.4%。咁既然物價升咗,選舉開支上限都要升返,而家就係6萬3左右,政府建議升到6萬9。
睇落係咪好似好公道?其實政府畀立法會份文件都有講,資助候選人係想鼓勵更多有志服務社會嘅人參選,並且創造一個有利香港政治人才發展嘅環境;既然係咁,點解明明講咗唔支持港獨嘅人,都冇得參選㗎呢?咁可能因為選舉主任已經化身所有候選人心裡面條蟲,知道候選人個心諗緊乜。
至於選舉開支上限方面,政府就話係想畀候選人喺公平環境下競爭。講得真係非常好,留意,係「講」,但有啲候選人參選前做個乜乜大使,然後掛巨型大廈外牆海報又可能唔計數,又或者,派蛇齋餅糉派到「派車」又可以唔計數,咁又叫公平咩?
順帶一提,除咗加資助額同上調選舉開支上限,政府都諗住使2,100萬元,喺出年分3個階段搞5個月嘅選民登記運動。