舊年被選民以選票踢出屯門區議會而有「何已完」之稱嘅新界西立法會議員何君堯,日前同香港政研會和新界大聯盟等牽頭成立「23同盟」,推動《基本法》第23條立法。同盟上月底發動網上聯署,號稱收集到「100萬」個聯署,可能得23%係香港人,同盟擔心代表性不足,所以今日喺全港多區擺街站收集簽名,但有網民就發現,佢哋會向聯署嘅市民派發抗疫物資,包括口罩、酒精消毒液,大鬧佢哋咁樣呃簽名真係「好cheap」。到底聯署者係咪真心支持23條?市民自己識得判斷啦!
唔好以為八方齋噏,有人證㗎。西貢區議員柯耀林辦事處職員今日同八方講,23同盟喺筲箕灣同西貢擺街站,都係一邊收集簽名、一邊派抗疫物資,街站附近甚至有警隊衝鋒車在場戒備,在場又有唔少大漢保護街站,當佢哋想舉機拍攝就會被阻擋,而現場有唔少公公婆婆被物資吸引而排隊拎禮物,街站義工只係向排隊人士講簽個名就可以拎抗疫物資,但就冇特別講解任何23條立法相關事宜。
據柯耀林辦事處職員所得市民報料圖片所見,何君堯本人都有出動到北角區收集簽名,但同盟一邊派緊防疫物資,何君堯同身邊嘅「大波Man」石房有就一邊冇戴口罩咁同街坊交流。
除此之外,柯耀林喺社交平台facebook都分享咗大埔墟嘅情況,見到早前喺微博呼籲「全國全民聯署」嘅「光頭警長」劉澤基亦現身,身為葵涌警署警長嘅佢着住防暴警制服,其間有收集簽名人士搵佢合照,柯耀林形容「好似明星咁同人合照」咁。
facebook都有唔少網民討論23同盟收簽名派物資嘅情況,有片段顯示,街站現場有廣播呼籲支持23條立法,但詳情欠奉,而排隊人士就一手簽名,一手收貨。唔少網民氣憤難平,話唔可以因為幾十蚊支嘅搓手液出賣人格。
學醫學專家袁國勇話齋,唔可以對疫情有所鬆懈,查實追求民主、公義都一樣,自由嘅代價就係要時刻保持警覺,加上留意返,而家搓手液喺市場上唔難買到㗎。
-----------------------------
【武漢肺炎】專頁 全民自救 抗疫資訊盡在《蘋果》
-----------------------------
【撐學生】
召集有心人 撐學生全年睇《蘋果》
立即按此