被高登巴絲封為「負皮王」嘅唯唯梁烈唯，上年貼出閱兵日敬禮相，被唔少網民插佢「擦鞋」，早前佢為信用卡拍廣告，更引起「公關災難」，唔少網民發起「剪卡」，就連佢上年10月有份主持嘅新節目《男人經》亦被叫停。

今日有周刊指唯唯患上「中漿病」，唯唯今早喺微博貼出疑似身在醫院嘅相，留言：「準備好了!」估計唯唯喺準備入去做手術。唯唯今日透過《蘋果》回覆：「小手術，多謝關心。」

據報道稱，唯唯上周一去咗尖沙嘴睇眼科同確定做手術嘅時間，噚日去咗九龍塘浸會醫院搞入院手續，唯唯向周刊稱自己患上「中漿病」，解釋係舊年已經有呢個病，因為隻眼生水泡，睇嘢唔清楚同好糢糊，之前想做手術，但自己好番，近日先再翻發，唯唯又稱今次冇上次咁嚴重，醫院建議佢都係做手術。

呢個病嘅成因有研究稱有可能係壓力大，而另一原因係疑外服提升性功能藥物或激素亦易誘發呢個病，唯唯喺報道笑指自己性功能本身夠用，相信係壓力大，又強調只係做一個小手術，事前向大台請咗四日假，手術後要留喺屋企兩日休息，唔曬得、要戒口。

「中漿病」係黃斑病變嘅一種，男性發病率比較高，主要係精神緊張同過度疲勞誘發，通常喺廿歲後先發病，影響視力，大多數患者會慢慢痊癒，亦可以做「小手術」令個病好番，但仍有復發嘅機會。