鄭秀文（Sammi）、楊受成及邱子傑夫婦今晚喺銅鑼灣利園出席眼鏡活動，Sammi喺台上提到要排隊驗眼，佢做訪問時就突然講笑：「隻眼仲好精靈，不過都要睇少啲電話、電腦呢啲，始終40幾歲都係高齡，視力算唔錯，冇老花、近視同散光，始終人大咗機械壞。」

Sammi就話身體冇乜「機械壞」，不過佢家中13歲老狗就因為第8神經有問題要睇醫生，由於唔想佢麻醉做手術，故睇中醫療法：「佢就啱啱出院，要照顧多咗，行路冇以前咁好，食藥多咗會尿頻，好似BB仔咁成日要換尿片，覺得好有愛，要更加珍惜，晏晝先帶完佢去針灸，中西合壁。」重提愛犬出事當日，Sammi透露愛犬成隻「撻」喺度，佢扶起佢去睇醫生整親腰：「我呢十幾日都冇做過運動，自己冇睇醫生，緊張佢多啲，體會到自己兒女咁照顧，突然有病都有驚，望住佢我都流眼淚。」

問到佢有冇為愛犬祈禱，Sammi表示：「都有，不過生命長短上帝話事，唔希望佢有病有痛，o依家佢病咗睇佢屙boo boo都好開心，好似做媽咪一樣，照顧小朋友加老人家。」Sammi更透露少咗外地工作及與安仔夾時間要留在家中照顧佢：「佢成日換尿片，摸佢ger ger冇冇濕，好溫馨，聖誕要開工拍戲，同安仔夾時間，唔可以屋企得佢一個，除咗愛，仲係負責任。」

楊受成就提到自己再做爺爺抱孫好開心，大仔楊其龍嘅BB喺3號出世：「好靚仔，靚仔過我好多，成6磅幾重，未改名，仲有20幾日時間改，英文名就交畀仔同新抱改，中文名就我改。」講到對孫仔期望，佢就話希望健康同開心，再問到佢抱孫會唔會向員工派利是，佢即笑言：「嘩，我唔係恒基，百日宴就仔同新抱話事，公司就係我話事，禮物仲諗緊送咩。」

另外，邱子傑提到同老婆李茂琪剛慶祝20周年結婚紀念：「送咗200支玫瑰，同戒指，因為20年前戒指唔夠靚，今次送咗5卡幾300萬戒指畀佢。」

更多娛聞，喺晒《娛果》
http://fb.com/appledailyent