視后胡定欣今晚喺將軍澳出席劇集《宮心計2深宮計》祝捷晚宴，期間同「皇上」馬浚偉一齊接受傳媒訪問。定欣近日忽然同被大台力捧嘅張振朗傳緋聞，有指36歲嘅定欣，感情路上跌跌碰碰，最終情傾31歲的張振朗，有讀者仲揾到兩人「撻著」嘅珠絲馬跡，就係一個由定欣好友Jimmy設計嘅生日蛋糕。（新聞連結：　 https://bit.ly/2LJImNB　）

對於呢段姐弟戀，振朗用「我都一頭霧水」來回應，而定欣今晚接受傳媒訪問，就冇直接否認新戀情是真是假，佢只係話：「無啦啦好突然有咁樣嘅新聞，真係好有趣！」馬仔仲喺呢個時候搭訕，幫記者問究竟真定假？點知定欣就好大聲咁，笑住叫馬仔唔好再問佢，話頭先已經答咗佢，馬仔就乖乖幫手解圍，笑稱：「係呀，佢頭先答咗我話係假架！」

咁，張振朗個31歲嘅生日蛋糕，真係唔係定欣送？佢好認真咁講：「個蛋糕真係唔係我送嘅，我朋友的確做蛋糕好覯，圈中好多人搵佢做，好出色，咁唔通個個關我事咩！」

但講到覺得對方點？有冇發展機會？定欣嘅回應就有啲離題喇，佢話：「振朗的確係新一代工作表現好好嘅男藝人，相信佢嚟緊嘅發展都好好，我出年都有《包青天》啦，大家又可以睇下《包青天》嘅劇，支持下我地啦！」兩人就係因為拍《包青天》傳日久生情喇……

然後，大家就問佢接唔接受姊弟戀？定欣就話：「覺得人與人之間冇年齡之分，你點同對方溝通之嘛！」馬仔此時又再搭訕，贊成定欣所言，話感情嘅嘢無年齡界限。

此外，講到《宮心計2深宮計》係今年大台收視之冠，定欣同馬仔都話好滿意，定欣話：「今年只係出呢部劇已經係收線之冠，公司下半年劇集有好成績，但呢部我哋有份拍嘛，好耐冇聽過有35點！」

馬仔就話自己咁耐冇返嚟，已經係收視之冠都算係咁。至於今年嘅視后同視帝又有冇信心？馬仔話：「視后啦，我從來無乜諗法，但公司比我都會要架！」定欣就講笑話佢哋兩個已經係皇上同皇后喇！