23歲日本女星武井咲日前宣佈與EXILE嘅32歲主音TAKAHIRO奉子成婚，雖然一對新人就搞出人命獲外界送上祝福，但同時亦鬧出不少是非，武井咲直至明年嘅工作都要變陣，令到其所屬Oscar事務所頭都大晒，盛傳武井咲會被廣告商炒魷，不過起用佢擔任代言人嘅公司都表明祝賀武井咲，表示合約冇受閃婚影響。

武井咲大肚約三個月，當拍完主演嘅朝日電視台劇集《黑革之手帖》後，同時又要趕拍10月開播NTV新劇《我可以威脅你嗎？》，而《我》劇已於昨日開工，電視台安排武井咲同男主角藤岡靛拍攝宣傳海報，武井咲穿白色連身裙獲藤岡靛送上鮮花，呢套新劇會在月中開鏡，劇組表示亦無意因武井咲大肚而修改劇本。