烽火硝煙未逝，緣起於內地野味。產自武漢的新型肺炎病毒大年初一前兩天經高鐵入侵本港，在傷痕纍纍的港人身上狠插一刀，血染百多條寶貴性命。專家曾稱香港可像台灣般完全擊退疫症，但特首林鄭月娥及問責官員死不封關，抗疫措施亦不顧現實、不理後果，限聚令、銅芯口罩、全日禁堂食、全民檢測等，連愛國名醫盧寵茂也看不過眼。2020年，視民意如無物的政府，一手摧毀港人除罩相見的盼望；2021年，還有多少人要用血淚為政權失策埋單？

旺角黑布街的Joyful Dessert House，曾獲米芝蓮及「米豬蓮」認證。開放式廚房設計，就是想與客人更親近，店主高太說，3月首次實施限桌令時如同晴天霹靂，「第一日我哋冇開舖，因為唔知點搞。我哋做甜品，梗係想招呼客人入嚟坐低慢慢食。後尾加隔板、拉返開啲枱，好在每一張都係2人細枱，相對冇咁煩。」

一年下來，食肆管制措施朝令夕改10多次，她最記得7月29日食肆全日禁堂食，中午一場陣雨，多少市民狼狽地在戶外扒飯盒，甚或跪地進食，她看着網絡瘋傳的照片、留言，非常難受。她認為政府抗疫，從不堵截爆發源頭，每次慣性地「攞食肆、酒吧開刀」，多少同業賠上生計、前途，自己舖頭也數度面臨結業。

政府不變自己變，她和同事鑽研外賣甜品保溫法門，到10月正式接團購定單，「成本增加咗十幾percent（百分比），但起碼（晚上）有生意，唔使蝕咁多」。她稱，若年頭一早封關、取消豁免檢疫制度也許會「冇咁苦」，「咁多醫生、咁多專家、咁多病者同屋企人都咁講，林鄭就係唔肯聽」。

抗疫措施本應是挽救民望的絕招，回顧香港民意研究所的調查，林鄭的支持淨值確由1月10日的-66%，升至11月中的-48%；同期食衞局長陳肇始支持淨值也由-24%回升至-2%。但民意研究所副行政總裁鍾劍華表示，一些逆民意而行的措施，也會即時拖累官員評分。全日禁堂食後，陳肇始的支持淨值即由7月時的-4%暴瀉至-21%；有份制訂政策的勞福局長羅致光，同期也由-10%跌至-20%，跌幅較2月拒絕封關時更明顯。

「禁堂食嘅慘情畫面有目共睹，影響好多支持政府嘅市民……所以每次（措施出台，民望）翻唔到身，或者冇一啲有意義嘅回升，官員不論評分或者支持淨值，都仲喺谷底」。鍾劍華認為，很多「抗疫」措施既不科學，也與政治掛鈎。堅拒封關、死撐限聚令、硬銷全民檢測，結果疫情一波接一波，「好多嘢都係做畀北京睇，結果係市民事前嘅判斷，例如全面封關、針對高危群組檢測，都好過政府，自然就更失民意」。

加上問責官員處處護航的嘴臉，更令人不齒，由年初林鄭指封關是歧視內地人、不准公務員戴口罩「戴咗都要即刻除返落嚟」；禁堂食時張建宗叫市民去郊野公園開飯、羅致光事後告解「我哋真係冇諗過」市民苦況等。鍾劍華相信，今年港府在「抗疫戰」上，民意實不進反退。

雖然翹首以待的武肺疫苗將於2021年來臨，但成效存疑，政府又無端奪去市民選擇疫苗的自由，已挑起另一波民怨，鍾劍華預料與第四波疫潮成為來年兩大計時炸彈。相信來年政府貫徹死性不改傳統，750萬市民繼續要為政權的錯埋單，難估幾多寶貴性命再被犧牲。

「我唔期望回復到疫症前嘅境況，只希望唔會更差⋯⋯不過呢個政府、呢個女人，大家明啦。」高太道。

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！