56歲影帝黃秋生成功尋親，與同父異母兄弟John William及David Frederick於香港見面。有媒體就將整件事拍低咗，仲為3人做咗個訪問。秋生表示自己當初放自己仲係BB時同父母嘅合照上Facebook，只係想尋親，而John同David竟然見到。二人表示：「我哋住喺澳洲，見到有個報道，相中係我哋嘅爸爸，抱住個BB，相中仲有佢媽媽，我覺得件事好神奇。」二人仲話爸爸從未講過呢件事：「爸爸從來都無提過黃秋生，我哋完全唔知，或者佢覺得尷尬啦，我唔知。」

兩兄弟知道秋生嘅存在之後，好快就決定要同佢見面：「我哋傾咗一陣，然後都係想過嚟同佢見面，即刻啟程就買機票過嚟喇。」秋生就話：「好開心呀！點會發生喺我身上？」秋生仲用「神奇」、「不可能」同「奇蹟」3個字形容呢件事：「俾雷劈咁，反應唔到！」更形容3人於機場，一見面就有熟悉嘅感覺，完全無隔膜。

John同David之前完全唔認識黃秋生：「我哋上YouTube搵佢啲戲睇，但冇影響我哋點睇佢。」而秋生通過兩位兄弟，認識多咗好多自己爸爸。John同David二人都感到好開心，可以搵番呢位失散嘅弟弟。最後秋生表示：「我成個人都改變咗，有啲感情同感受醒咗，發覺原來我都有值得開心嘅事。」更覺得呢件事係有爸爸嘅「美意」：「爸爸曾經寫信俾我，話如果我係個好孩子，就會幫我搞掂啲嘢。我諗佢而家覺得我係個好孩子喇，所以咪送咗兩個大佬嚟俾我囉。」

精選娛聞，喺晒《娛果》
http://fb.com/appledailyent