已經有一排冇新盤推出，樓市轉旺，長實（001）近排推出天水圍嘅栢慧豪園，成為咗大家嘅焦點。華華上網想搵吓呢個盤嘅資料，點知屋企部電腦打極都打唔到樓盤個名，原來栢慧豪園個「栢」字係香港字，唔係部部電腦個字庫都打到。

唔講唔知，長實旗下嘅樓盤，原來好鍾意用呢個「栢」字，好似海栢花園、栢慧豪園咁。同個地產代理吹水講開，佢話畀華華聽，長實鍾意用有多一劃嘅「栢」字，但恒基（012）樓，就會用「柏」字，除咗香港嘅京士柏山，連上海嘅金柏苑都係用「柏」字。
經呢個地產朋友講一講，華華即刻睇埋其他地產商，究竟用「柏」定「栢」多！發覺唔同地產商，原來都各有所好，好似信和就同恒基一樣，佢哋旗下嘅帝柏海灣、柏景灣，都係用個「柏」字；太古嘅太古城銀「栢」閣，就同長實用埋同一個字。

唔理「柏」定係「栢」，同一個地產商，通常都只會用其中一個，但係恒隆（101）陳啓宗就比較另類，兩個都有用，可以話係騎牆派，佢哋70年代用「柏」，代表作有恒柏園；但80年代之後，就轉用「栢」字，好似栢景臺同埋雅栢苑咁。
究竟兩個字有乜分別？華華讀得書少，為免出錯，即刻攞本《辭淵》出嚟查一查，發覺原來「栢」字係「柏」字嘅俗體字，所以冇話邊個啱、邊個錯，最多都係「正」同「俗」嘅分別！
[email protected]