法國球王施丹上周六起應邀來港出席品牌活動，如果唔係特登去捧場，相信都好難見到呢位球壇巨星，估唔到一班青年民建聯成員卻遇上施丹，當然唔執輸影相集郵，但據知呢位球王最初都唔多樂意，無理由係因為，政治立場唔同啩？

話說青年民建聯主席、觀塘區議員顏汶羽今日喺尖沙嘴嘅一條天橋同青民成員拍短片，點知拍拍下離遠見到一堆人，好大陣仗咁出現。八卦係人之常情，顏汶羽自不然望多兩眼，「覺得咁熟口熟面...咦，真係施丹喎，咪膽粗粗主動上前同佢影相囉！」

可能始終係巨星，影相方面未必想咁隨便？顏汶羽話當時施丹似乎「唔係好想咁」，之後在場職員話影一張啦，終於先可以成功集郵。顏汶羽係足球發燒友，佢對「施丹轉身」無限讚嘆，唔知佢有冇學到出神入化？