各位觀眾，歡迎收睇由元朗圍村居民豪情贊助、網民轉播嘅「元朗赤口靈蛇煙花賀新歲」。多得熱心網民現喺YouTube轉載，令大家剛踏入癸巳蛇年，就見識到元朗人天生硬骨頭，無懼警權無限大，決心「公民抗命」捍衞新春放煙花呢個傳統習俗。
全長1分47秒嘅煙花分為三幕，YouTube版有埋喜慶配樂。第一幕「保鄉衞族滿天紅」，煙花蜻蜓點水，意即村民示威相當有「食力」。第二幕係「家家僭建步高昇」，由「靈蛇」劃破夜空，爆發一輪煙花，寓意僭建遍地開花，應該特赦。第三幕係「丁權永續樂昇平」，連珠炮發，添丁又發財。

拍攝短片嘅大會攝影師疑似一家三口，小朋友高喊「好多、好勁」，男嘅就話「今年勁有錢！」YouTube已經有7,000多個點擊，力壓初二維港煙花不足2,000次點擊。有網民就話，事件證明新界人嘅「軍火」好勁！
不過，八鄉鄉事委員會主席曾憲強同十八鄉鄉委會主席梁福元都話，全無聽聞有人放煙花。警方睇完條片之後話會了解吓，話喺年初一至初三，元朗分區收到7宗有關違法放煙花舉報，八鄉分區就收到1宗。
網址： http://www.youtube.com/watch?v=cghxHNbd8FM

mailto:[email protected]