韓劇《泡泡糖》36歲女星鄭麗媛，去年10月爆出同男團WINNER 23歲前成員南太鉉發展姊弟戀，當時指兩人喜好相近，自自然然發展成情侶，並已經拍拖近1年，又不時透過Instagram傳情，不過當時鄭麗媛方面就否認戀情，表示兩人只係普通朋友。不過今年1月有網民發現南太鉉上載到IG嘅相有一隻女仔手，而隻手同鄭麗媛隻手相似，令人再度懷疑兩人嘅關係。

而今日鄭麗媛及南太鉉三度傳出緋聞，據報道指：「雖然鄭麗媛多次否認與南太鉉嘅戀情，但兩人確實仍維持好好嘅關係。」報道又指鄭麗媛正忙於拍新片《Gate》，南太鉉除送上咖啡車為女方打氣，更於今日凌晨到拍攝場地等鄭麗媛，而現場嘅工作人員亦都見到南太鉉嘅蹤影，兩人嘅緋聞似乎屬實。據知情人士透露：「南太鉉喺現場等咗好耐，之後鄭麗媛就出現，兩人好似戀人咁好Sweet咁傾偈。」

對於再次傳出緋聞，鄭麗媛方面再度否認：「因為聽到《Gate》進入最後拍攝階段，所以現場都有唔少好友嚟咗撐場，包括孫丹菲、MV導演及圈外好友等，南太鉉只係其中一個好友，緋聞並非事實。」