前日中港兩隻超級新股上市，認購反應熱爆，但不約而同，多位股壇前輩都同敏妮講，「星期三實反高潮。」薑果然係老嘅辣！其中有個前輩同敏妮講，一早見勢色唔對，沽晒手上抽到嘅金隅（2009）。佢所謂嘅「勢色唔對」，係指金隅首日開市價，低過暗盤價。
前輩話近嚟上市嘅新股，好少開市唔到暗盤價，金隅居然開唔到口好價，要沽！星期三埋單計數，前輩的確有佢嘅道理，金隅雖然首日冇跌穿招股價，但最後連10蚊都保唔住，同其他新股王相比，係遜色咗啲。
不過用開市到唔到暗盤價嚟衡量，又未必次次都準。就以近期6隻新股做個統計，除咗金隅，霸王（1338）同秦發（866）都開唔到暗盤價，尤其係秦發，首日高位都唔到暗盤價，但之後佢哋嘅表現都相當見得人。相反，361度（1361）首日開市就係暗盤價，但首日見完個高位後，家陣都未見番當日個高位。金隅命運如何，會唔會好似霸王同秦發咁，有待分曉。

同樣係新股爆炒潮，大陸情況比香港更瘋狂，前日睇內地有段分析文章，講到大陸新股「首日爆炒」，全拜新股上市首日無漲跌幅限制規則造成，文章引述市場人士分析，「新股不敗」唔係因上市公司錯估招股價，而係一啲參與新股申購嘅機構，利用新股上市首日無漲跌幅限制嘅規則，瘋狂抬高股價，然後利用第二日開始嘅跌幅限制，逐步出貨。
文章仲引述咗深交所嘅研究，話91年至今年6月，投資者喺新股上市首日追入並持有一段時間後賣出，損手可能性絕大多數情況下高達60%。07至08年仲高達80%至90%。
好彩香港炒股冇咁多規限，炒新股出事機會減少，更重要可能係好似一位前輩講，「大陸炒股仲有咁多規則，暫時都未能趕及香港，做國際金融中心。」
溫敏妮
http://wanmanli.com/blogs/

361度(1361)
暗盤價：4.13元　首日開：4.13元　首日收：3.90元　首日高：4.28元

霸王(1338)
暗盤價：3.07元　首日開：2.95元　首日收：3.03元　首日高：3.20元

秦發(866)
暗盤價：2.83元　首日開：2.65元　首日收：2.68元　首日高：2.80元

琥珀(090)
暗盤價：2.26元　首日開：2.56元　首日收：2.71元　首日高：2.98元

志高(449)
暗盤價：2.87元　首日開：2.92元　首日收：2.51元　首日高：3.12元

金隅(2009)
暗盤價：10.36元　首日開：10.20元　首日收：9.97元　首日高：10.50元