如果你有收看過小丸子卡通，就請發揮一下想像力，把對話套在適當的人物上！
兩爺孫正在屋內無無聊聊，呼的一聲，剛好有陣風把一片樹葉，沿着一條S字形的路線輕輕吹過，真有無聊的意境。
孫女：爺爺，點解涂謹申叔叔唔可以返鄉下？
爺爺：因為佢曾經去過美國嘅香港聽證會，指手劃腳香港嘅內部事務，係漢奸。
孫女：咁點解何秀蘭姨姨都唔可以返鄉下？佢好似冇去過美國指手劃腳喎。
爺爺：係因為何姨姨抵得諗，一早讓咗返鄉下個位畀民建聯嘅葉叔叔吖嘛，咁自己咪冇得返囉！
（沉默一陣）

孫女：爺爺，好奇怪，點解我坐喺個臭臭塔咁耐都屙唔出臭臭嘅？
爺爺：哦，唔係好奇啫，好似有啲人攞住回鄉證，回咗好多次都回唔到鄉啦！
孫女：係喎，但係有啲人就唔使攞回鄉證都可以回鄉啦！好似啲壞人着草啦。
爺爺：係啊係啊！好似你有時屙臭臭都唔一定要坐喺個臭臭塔度啦！
孫女：（有小小挫折）……係啊，屙臭臭真係好難控制。
（再沉默一陣）
孫女：係喎，爺爺，點解佢哋咁想返鄉下？乜鄉下有啲好玩嘅地方咩？
爺爺：有啊，佢哋去咗麒麟山莊玩啊。
孫女：麒麟山莊有乜嘢玩㗎？
爺爺：好似話想喺隻難得一見嘅千年火麒麟面前放個屁，不過最後個屁就放咗畀隻十年火麒麟。
孫女：咁咪放錯屁？
爺爺：唔係喎，因為隻十年火麒麟話會將個屁原原本本咁帶番畀千年火麒麟啊。
孫女：哈，返鄉下放屁又幾好玩喎。