去年初意大利品牌DOLCE&GABBANA禁止途人拍照嘅無理霸道，搞到全城憤怒，更有人發起「D&G門口萬人影相活動」，當時黃夏蕙BB (下稱夏蕙B) 亦曾高調踩場，更無懼黑人保安，喺D&G門前喪影，實行以行動向霸權sayno﹗

事隔一年多，另一品牌LV（LouisVuitton）竟然為咗張啡色格仔皮圓凳及洗頭椅，而告髮型屋侵權，兼要對方賠款及登報道歉，事件惹起全城熱「罵」，好多人對LV此舉反感兼鬧爆LV，而唔少相關惡搞嘅「格仔」產品，包括祭品、格仔餅、棋盤、垃圾桶等等，亦喺網上瘋傳及遭惡搞，而當中有間證券公司嘅袋，同LV近乎一模一樣，啲網民寸爆LV點解唔告埋佢？

夏蕙B今日再化身公義女神，展開「夏蕙行動」，通告寫住， 佢會三點半喺中環置地廣場LV門口 ，以 「性感衣著」﹑食住格仔餅向LV挑機 ，到時仲會有名律師在場，講解侵權法定義。據有份舉行嘅公司發放採訪通告，今次活動最主要目的有三個：

1.希望LV控告小商店前，先出警告信，而不是立刻追討賠償；
2.LV應該追討製造商，而不是小商戶；
3.希望LV能著酌情豁免今次這班小市民，不知者不罪也。

唔知夏蕙B嘅「性感衣著」係點呢？會唔會係全身格仔？拭目以待﹗心急嘅中環OL，可以三點半偷雞落公司樓下，睇吓夏蕙B點樣用佢嘅body為小市民fight﹗歡迎上我哋《蘋果》facebook貼圖share﹗