郭少芸92年選美出道，雖然三甲不入，但就加入咗大台開始拍戲。唔好以為選過港姐，就一定有得演黃花閨女，郭少芸就啱啱相反，好多令人有印象嘅角色，都嘈嘈閉或者好巴辣，同乖巧斯文永遠都拉唔埋，好似喺《大鬧廣昌隆》嘅「倀雞英」、《真情》演郭可盈家姐「細孖」咁，真係想唔記得都難。

入行第9年，郭少芸再次喺《錦繡良緣》演少奶奶，負責同梅小惠鬥嘴，充滿火花，劇集收得又入屋，但毅然推咗近千集嘅《皆大歡喜》，01年決定離開大台，郭少芸曾經喺訪問中話：「當時32歲，覺得自己除咗拍戲之外乜都唔識，好冇安全感。」就係呢個原因決定外闖做生意。

離開咗4年，郭少芸喺《火舞黃沙》客串，終於正式回巢，先後拍咗《賭場風雲》同《珠光寶氣》呢啲大製作，喺11年仲有份提名爭大台「最佳女配角」獎。不過，近年對佢有最多印象嘅，就一定係8點檔嗰啲闔家歡劇集，事關佢由07年開始嘅《同事三分親》、《畢打自己人》、再到《愛．回家》系列嘅「孻姑」，都係老是常出現，陪住各位家庭觀眾食飯。