通常去到每屆立法會屆尾，八方都會同大家回顧一下咁多位立法會議員中，邊一位係少開會、少參與立法會事務嘅大懶蛇，靠嘅就係去立法會圖書館嗰度睇考勤紀錄。不過以後大家隨時都可以睇到呢啲資料喇，因為立法會網頁悄悄地出咗個新功能，專門提供議員喺議會工作嘅紀錄。

舊時立會個網只係睇到議員嘅履歷、利申同聯絡資料，而家上去就會見到有個「議員參與立法會事務紀錄」嘅連結，一click入去最先見到係一眾議員嘅嘜頭。

八方以元秋民建聯蔣麗芸做例子，㩒咗元秋嘜頭之後，見到有立法會會議、內會、財會等分類，如果再㩒入去財會，就見到元秋嘅出席率有89%，算係唔錯喇。議員除咗負責批錢外，亦身負審議法例嘅工作，所以我哋又睇吓元秋入咗幾多個法案委員會先，原來係有5個，不過喺《2017年僱傭（修訂）條例草案》委員會嗰度係零出席率喎，雖然呢個草委會只係開過1次會，但元秋都冇去，曳曳喇！