台灣天團五月天將於今年五月喺香港迪士尼樂園舉行露天演唱會，雖然門票喺聽日，即係29日公開發售，之不過喺一票難求嘅情況下，又係排隊黨出動，日前喺尖沙嘴金馬倫里通利琴行外，孟加拉籍排隊黨同聲稱代廈門粉絲團朋友預先排隊嘅港男，因爭排頭位起爭執，港男遭一名南亞裔男子以摺凳扑頭，行兇者逃去，傷者送院敷治(新聞連結： https://bit.ly/2G8uYzT )。

主辦單位特高娛樂今日發聲明，除咗向該名受傷歌迷致以關心同深切慰問外，對於呢種野蠻暴力行為，表示極度憤怒，近日「排隊黨」嘅霸道情況愈見猖獗，佢哋決定將行動升級，噚晚去咗尖沙咀警署遞交有關信件，要求警方作出支援。

警方亦正視呢個問題，將信件分別交俾分區指揮官同警務處處長。特高娛樂作出嚴正呼籲，歌迷如果喺排隊遇到不公平、被恐嚇或襲擊時，應即時報警求助，亦要堅持立場，切勿購買「黃牛票」，以免助長歪風。

特高娛樂提到有部分傳媒查詢有關「實名制」登記購票嘅可行性，其實自舊年度開始，已著力研究有關事件，跟城市售票網商討過，仿傚台灣做法，劃分部分區域門票嘗試「實名制」登記，不過因為場地落實時間太倉促，售票網絡唔能夠趕及安排有關配套，最後唔可以喺今年度推出，不過佢哋仍希望購票程序喺公平、公正嘅環境下進行。

精選娛聞，喺晒《娛果》
http://fb.com/appledailyent