橫跨麗的到亞視主持《六合彩》多年嘅夏春秋（冬叔），現年86歲老當益壯現身新亞視開台，冬叔表示：「自己算元老級，麗的年代已經喺度。」問到會幫手做啲乜？冬叔坦言：「o依家傾緊，如果可以播《六合彩》都有吸引力，自己都有啲興趣，因為做幕前好似吸毒咁，自己入行40幾年，50年已經入行。」

眾所周知，冬叔嘅女兒係吳君如，問到仔女會唔會驚爸爸辛苦，唔畀佢做呢？冬叔表示：「都有呀，佢哋唔畀我拍電影，因為大陸製作始終唔適合，不過托賴自己身體好好，只係膽固醇高啲啲啫，行得走得，都有食吓牛扒㖭呀。」

此外，舊亞視財經節目主持章佳強和吳泳茵，佢哋o依家再返亞視主持《贏家ONLINE》，屋企人有冇擔心？章佳強話：「無喎，仲問我APPS點用。」吳泳茵話：「公司追住我，收利是，o依家多幾個平台，多啲選擇，有個良性競爭。」講到出糧，佢哋話：「有早無遲，唔怕無糧出。」但係網民唔睇好亞視？佢哋話：「負面評論會接受，會改善，公司新管理層，成個背景唔同咗，唔會擔心，咁大風波都經歷過。」

更多娛聞，喺晒《娛果》
http://fb.com/appledailyent