當年今日

馮仁昭四圍超:
李忠希大眼B女與狗同眠 - 馮仁昭

蘋果日報 2012/10/25 00:00


啱啱過檔城電嘅無綫前藝人李忠希,今年真係喜事重重,除咗加人工之外,最近仲同結咗婚兩年嘅空姐太太生咗第一個愛情結晶品。噚日記者致電恭喜忠希,佢好開心咁話:「係呀,10月19號太太剖腹生咗個6磅7安士重嘅BB女。」見佢將同BB嘅合照放上facebook,囡囡眼大大、鼻高高,一副美人相,忠希話:「我都唔知佢似邊個?但肯定係大眼妹。」
empty
李忠希的囡囡眼仔大大,似乎得到爸爸嘅遺傳。互聯網圖片
望女做獸醫
忠希當然希望個女未來行一條康莊大道,所以特別搵玄學師傅幫囡囡改番個好名:「我想改『子琳』,但只屬好初步,英文名就留番畀媽咪改。」忠希亦唔敢對囡囡將來有太大期望,只希望佢健康快樂成長:「只想佢做個好人,不過同太太都鍾意養狗,希望可以培養到囡囡嘅愛心,將來做獸醫。」
唔知忠希會唔會擔心BB同狗仔相處有困難?佢話:「呢個問題好多人問過,家喺床頭放咗淨化機,仲每日吸狗毛,暫時都冇乜問題。我亦有上網搵資料,話BB同寵物一齊成長,抵抗力會強啲。」
empty
李忠希同任職空姐嘅太太結婚兩年,上周生咗個寶貝女。資料圖片
empty
李忠希唔擔心B女同愛犬難共處,仲希望培養個女將來做獸醫。